viernes, 11 de noviembre de 2011

ESCARAPOTE CON ERVILLAS

INGREDIENTES (para 5 persoas):

2 ESCARAPOTES (enteiros, descamados, coa cabeza cortada)

1 cebola grande

2 dentes de allo

½ pemento verde

½ pemento vermello

2 tomates maduros (pelados)

3/4 kg de Chícharos ou ervillas

Para o caldo: 1 allo porro, 1 cenoura, 1 cebola, perexil

1kg de patacas medianas (aprox)

Un vaso de viño branco

Azafrán, aceite e sal

- O primeiro é montar o caldo coas cabezas de escarapota. Poñemos nunha ola as cabezas dos escarapotes cos vexetais do caldo: 1 allo porro, 1 cenoura, 1 cebola, e o perexil. (O caldo de peixe nos vai quedar exquisito en 10 minutos fervendo). E mentres se vai facendo o caldo imos torando o peixe e o salgamos.

Agora imos preparar o sofrito, poñemos aceite nunha tarteira e cortamos o allo, a cebola e os pementos. Poñemos todo a pochar. Cando as verduras están xa ben pochadas e o momento de botarlle os tomates, ben picados. Deixaremos que coza todo xunto uns 10 minutos.

Cando o tomate xa está cociñado, incorporamos na tarteira as patacas cortadas e as ervillas. Dámoslles unha voltiña co sofrito e cubrimos todo co caldo. Poñemoslle un sobreciño de azafrán moito e un pouco de sal.

Coas patacas xa case feitas, incorporamos o peixe e botamos un pouco de viño branco porriba do peixe. En seis minutos xa está todo listo.

FEIXÓNS VERDES CON VINAGRETA

INGREDIENTES (para 5 persoas):

Feixóns verdes (3/4 kg)

2 cenouras medianas

1 ovo cocido

Aceite e vinagre

  1. Cortamos as xudías en bastóns e as poñemos nunha ola con auga e un pouco sal, no lume.
  2. Cortamos as cenouras en bastonciños.
  3. Poñemos na tarteira as cenouras e os feixóns.
  4. Mentres cocen, preparamos a vinagreta: esmagamos o ovo nun bol, engadimos 3 partes de aceite e 1 de vinagre, e remexemos ben todo.
  5. Cando as verduras estean cocidas, as escoamos e as colocamos nunha fonte xunto coa vinagreta.

TRES GALEGOS

INGREDIENTES (para 5 persoas):

3 ou 4 rosquillas

500 grs de requeixo galego (cremoso sen azucre)

Un pouco de mel galego

Unhas fresas

5 ou 6 melindres (para adornar)

Comezamos por esmagar nun prato, cunha culler, as rosquillas e as deixamos en cachiños.

No vaso do batedor poñemos as fresas e un par de culleradas sopeiras de mel. Batemos todo.

Collemos un vaso e montamos a lambetada: poñemos un fondo de rosquillas, despois unha capa de requeixo (o remexemos antes) e por último, botamos porriba a froita co mel. Hai que ter moito coidado para que non se mesturen as capas.

Como adorno final colocamos un melindre colgado no bordo superior de cada vaso.

*Podemos facer unha capa de cada ou alternar un par de capas de cada. Tamén se poden empregar outras froitas.

lunes, 31 de octubre de 2011

“Un día redondo”


O mércores 9 de novembro, ás 22:30h na TVG, os larpeiros prepararán un riquísimo guiso de escarapote con ervillas; ademais como sobremesa os nosos amigos vanse dar un gusto: prepararán a copa dos tres galegos, unha sorpresiña con requeixo do Eume, mel do país, rosquillas e uns bonitos e saborosos amorodos.

Para tan ricos manxares o xornalista de investigación Tomás Alonso desprazarase ata a festa de San Bieito, en Gondomar, na provincia de Pontevedra, onde agarda por el no seu posto de rosquillas a súa amiga María, unha simpática muller que pertence a unha familia de grandes rosquilleiros. Será ela quen lle aprenda o oficio a Tomás, que vai levar como agasallo polo seu traballo unha bolsa de rosquillas…logo de comer algún bolo e algún melindre, claro. Veremos tamén como se elaboran todos estes produtos na fábrica de rosquillas de Silleda e xa a lume de carozo Tomás deberá ir cara o mercado de Teis en Vigo para facerse cunhas verduriñas e uns escarapotes no posto de Roberto, antes de regresar.

lunes, 24 de octubre de 2011

Este mércores 26 de outubro, ás 22:30 na TVG: "Un menú de ricos!"


Esta semana a cociñeira do restaurante "O Croque" do Museo do Mar de Vigo, Celia Cabrera, e Benigno, van preparar unha ensalada de lumbrigante e un guisiño con lumbrigante e peixe sapo.

Para iso, na Guarda, Paco lle vai aprender a Tomás todo o necesario para pescar lumbrigantes coa arte de pesca do miño.

Unha vez rematada a xornada de pesca, Tomás marchará cara ao mercado de Pontevedra para facerlle unha visita a Marcos, o seu peixeiro de cabeceira.

Veremos como lle quedan a Celia e a Benigno esa ensalada e ese guiso.

lunes, 17 de octubre de 2011

Aviso

Esta semana o noso programa déixalle o seu tempo ao fútbol. Vémonos a vindeira semana!

jueves, 13 de octubre de 2011

VERDINAS CON NAVALLAS

INGREDIENTES (para 5 persoas):
700 grs de verdinas (que xa temos a remollo)
40 navallas (3 ducias e media)
cebola,
allo,
tomate maduro
viño branco
pemento doce
aceite e sal
 - Empezamos por poñer as verdinas a cocer na ola exprés, en auga fría con algo de sal e acompañadas dunha cebola con cravo e loureiro, durante uns 30 minutos.
 - Mentres abrimos as navallas, dándolle unha fervura breve nunha cazarola cunha pouca auga. Unha vez abertas, reservamos a auga da cocción e apartamos as navallas para unha fonte.
 - Agora poñeremos en marcha o sofrito. Colocamos na tixola un pouco aceite, picamos allo e cebola, os poñemos a pochar a lume suave.
 - Mentres retiramos as viandas das navallas e as cortamos pola metade, retirándolle a parte negra. Cando allo e cebola estean xa pochados, incorporamos o tomate natural, pelado e picado. Deixamos que se faga con calma.
 - A continuación incorporamos as navallas no sofrito e unha cullerada de pemento doce. Mollamos cun pouco de viño branco, deixamos que se faga todo un par de minutos.
 - Cando estean as verdinas as xuntamos co sofrito coas navallas noutra tarteira e o deixamos a lume moi baixo, se engade un pouco de auga e algo da auga de cocción das navallas. Remexemos con delicadeza.
 - Deixamos que coza suavemente cinco minutos e listo!

CREMA DE PEXEGOS

INGREDIENTES (para 5 persoas):
4 pexegos bonitos (de Calanda, grandes)
3 iogures
½ bote pequeno de leite condensado
Zume dun limón pequeno (ou medio limón)
Follas de menta para adornar
1. Pelamos os pexegos e retiramoslles as carabuñas.
2. Cortamos os pexegos en anacos e poñémolos no vaso do batedor.
3. Engadínmoslles o zume de medio limón, os iogures e o leite condensado.
4. Batemos ata desfacer ben os pexegos e lograr unha textura cremosa.
5. Servir en boles.
6. Colocar folliñas de menta fresca para adornar e darlle aroma.
7. Meter os boles da crema de pexegos na neveira para tomar fría.

lunes, 10 de octubre de 2011

Mércores 12/10/11, ás 22:30h aprox. na TVG: "Marchando unhas navallas"




Os lambóns máis simpáticos da Televisión de Galicia regresan cunha receita con verdinas ou ‘fabas de marisco’. A receita que propón o noso cociñeiro serán unhas navallas con verdinas.

Para tan ricos manxares o xornalista de investigación Tomás Alonso desprazarase ata o concello de Moaña, concretamente ó areal da Xunqueira. Alí quedará con Alicia, unha mariscadora de primeira que lle amosará todo o relacionado coa recollida das navallas de calidade que saen desa zona.

Unha vez rematada a dura xornada de mariscador, Tomás colle rumbo ó mercado de Moaña para comprar todos os ingredientes que precisa Benigno. Do mercado levará unhas navallas da ría de primeírisima calidade, ademáis de diferentes legumes para a receita.

Unha vez na cociña comeza o laborioso proceso de elaboración da receita de hoxe, unhas navallas con verdinas. Pero aí non queda todo, porque os larpeiros obsequiaranos cunha lambetada: unha rica crema de pexegos.

Veremos como lle queda a Benigno e a Lola o plato, e a lambetada….

Eu non o perdería, lambonciños!

SARDIÑAS CON QUEIXO DE SAN SIMÓN

INGREDIENTES (para 5 persoas):

Un par de sardiñas pequenas por cabeza

Un pouco de queixo San Simón

Un cacho de cabaza

Brócoli



O primeiro é cocer a cabaza nunha tarteira pequena con auga. Troceamos a cabaza e poñémola a cocer con algo de aceite e sal uns dez minutos.

Despois hai que limpar e facer 2 lombos con cada sardiña e colocar unha tixola pequena para poñer as sardiñas. Dámoslle un golpe de prancha ás sardiñas pola cara de dentro.

Colocamos as sardiñas nun prato que poida ir a microondas. Cortamos finas láminas ou lascas de queixo San Simón e poñémoslle a cada sardiña unha fina lasca de queixo porriba. Un minuto no microondas, para que funda o queixo é suficiente.

Mentres, a cabaza xa está cocida. Escoamos a cabaza e esmagámola coa axuda dun garfo, mái un fio de aceite e unha areiña de sal. Podemos poñerlle unha pinga de nata para que quede mais fino este puré.

Para empratar poñemos un rectángulo de puré de cabaza e sobre cada rectángulo unha sardiña co seu queixiño fundido.

BACALLAU CON SALSA DE TOMATE

INGREDIENTES (para 5 persoas):

5 talladas de bacallau (bo, groso e ben desalgado)

Para a salsa :

Un par de quilos de tomates maduros

Cebola nova, allo e aceite.

Azucre (unha pisca)

Para acompañar:

5 patacas

Un pemento vermello,

outro verde.

unha cebola nova.





O primeiro é pochar a cebola tenra e o allo. Mentres, cortamos os tomates.

Incorporamos os tomates á tarteira, cunha pisca de sal e outra de azucre. Deixamos que se faga todo na tarteira (destapada) durante unha hora e media.

Poñemos a quecer o forno para o bacallau, secamos ben as talladas ou postas de bacallau con axuda dun pano, poñemos unha tixola no lume cun pouco de aceite

Enfariñamos o bacallau. Fritimos as postas de bacallau polos dous lados, na tixola.

Logo, reservamos as postas e conservamos o aceite da fritura.

Poñemos unha tarteira con auga para cocer as patacas escachadas (cortadas en cachos pequenos-medianos), tamén engadimos: pemento vermello, pemento verde, cebola e

un chorro de aceite.

Nunha fonte de forno poñemos capas: unha de salsa de tomate, unha de bacallau,

outra de salsa e un pouco do aceite de fritir o bacallau.

Metemos o bacallau no forno e en 15- 20 minutos estará listo.

Dispoñer todo nunha fonte: o bacallau coa súa salsa, e as patacas cocidas e aromatizadas polas verduras á súa beira.

lunes, 3 de octubre de 2011

O TOMATE PERFECTO!


CAMBIAMOS O DÍA DE EMISIÓN. AGORA O PROGRAMA VAISE EMITIR OS MÉRCORES ÁS 22:30H.

lunes, 19 de septiembre de 2011

Mañá martes 20 ás 22:10 na TVG: "O reino do mirabel!".

Os larpeiros regresan mañá cun riquísimo polo con mirabeis. Para esta receita contarán cun invitado moi especial, o cociñeiro Xosé Cannas. Un prato que terá como sorpresa un postre moi doce, uns biscoitos de chocolate con salsa de mirabel, lambonciños.

Tomás Alonso desprazarase ata O Rosal e alí, da man de Salvador e Xosé Manuel, aprenderá todo o relacionado co mundo do mirabel. Despois acercarase ata a fábrica de A Rosaleira a saber algo máis sobre o mundo do mirabel, pero desta vez en conserva.



lunes, 12 de septiembre de 2011

"Porcos moi ilustres!"


Mañá martes 13 de setembro ás 22:10, na TVG, os larpeiros van preparar un guiso de manciñas de porco de primeira división. Un prato que terá como sorpresa mesmo un postre de sete estralos, lambonciños.

Para iso Tomás Alonso desprazarase ata Viana, en Chantada, unha terra rica en case todo, pero moi afamada polo embutido que fai o Caballero de Vina, o señor Moure, gran amigo de Tomás.

O primeiro que terá que facer o noso larpeiro itinerante vai ser aprender a criar porcas en liberdade. Que comen, que fan e como viven…

Así que unha vez coñecida a teoría sobre o mundo do porco, Tomás desprazarase cara a praza do Progreso en Vigo, onde Héctor o carniceiro de cabeceira de Tomás vai facer a manicura a unhas manciñas de porco.

Veremos como lle quedan a Benigno ese guiso….e o postre. Atentos o prato, larpeiros. Eu non o perdería, lambonciños!!

miércoles, 31 de agosto de 2011

PREPARACIÓN CAMARÓNS COCIDOS

Para cocer os camaróns:

-Poñer no lume unha perola con auga, engadir sal ata deixar a auga salgada como se fose auga de mar (35-50 gramos de sal por litro).

-Cando ferva a auga botamos os camaróns. Un minuto o minuto e medio de cocción será suficiente.
(Pódese botar loureiro)

-E para que queden máis duros e brillantes, imos empregar un pequeno truco. Cando estean listos, ímolos poñer nun bol con auga fría con xeo e sal.

RECEITA - POTA GUISADA CON PATACAS

INGREDIENTES (para 5 persoas):

Ingredientes....

1,5 kg de pota

1,5 kg de patacas

2 cebolas

1 pemento vermello

2 dentes de allo

2 tomates maduros e pelados

1 cunca de chícharos

Azafrán

Viño branco

Aceite de oliva e sal



-Nunha cazola poñemos un fondo de aceite no que refogaremos o allo, a cebola e o pemento ben picados. Cando a cebola estea transparente, incorporamos as potas limpas e cortadas en anacos, deixamos que se fagan durante dez minutos e entón engadimos o tomate cortado en anacos e despois duns minutos as patacas tamén cortadas en anacos para guisar, botamos o viño, un pouco de auga e o azafrán e o colorante. Cando as patacas estean feitas (uns 25 minutos despois aproximadamente), xa o podemos servir.

-Podemos acompañar este guiso cunha ensalada de espetos, feita con anacos de aguacate, dados de mazá, tomatiños cherrys e camaróns cocidos e pelados, todo regado cunha vinagreta.

martes, 30 de agosto de 2011

RECEITA - ENSALADA DE ESPINACAS

INGREDIENTES (para 5 persoas):

Follas de espinacas lavadas

Dados de mazá golden

Dados de tomate

Sementes de sésamo

Aceite e Sal


- Colocamos as follas de espinaca facendo dúas coroas, coas puntas para fóra.

- Amoreamos os dadiños de mazá no centro.

- Tamén os dadiños de tomate.
- Engadimos unha cullerada de sementes de sésamo.

- Poñemos aceite e sal (mesturados)

RECEITA - NAVALLAS EN VINAGRETA

INGREDIENTES (para 5 persoas):

2 ducias de navallas en auga con sal (para que expulsen areas)

Cebola nova, pemento vermello, pemento verde, un dente de allo, perexil.

2 ovos cocidos, aceite, vinagre de boa calidade, perexil e sal.

- Empezamos por abrir as navallas cocéndoas un minuto en pouca auga con sal.

- Retiramos as navallas do lume, deixamos que arrefríen uns segundos para que non queimen e desbotamos as cunchas (coa axuda dun garfo) .Poñémolas nunha fonte.

- Picamos as verduras: dente de allo, cebola nova, pementos vermello e verde, e os ovos. Xuntamos no bol as verduras picadas e os ovos tamén picados. Remexemos mentres incorporamos aceite de oliva, vinagre e sal. (Proporcións 3/4 de aceite e 1/4 de vinagre).

- Remexemos ben para emulsionar un pouco a vinagreta e botámola porriba das navallas.


- Rematamos co perexil picado e listo!

RECEITA: LENTELLAS CON VERDURAS E PASPALLÁS

INGREDIENTES (para 5 persoas):

500 grs de lentellas, a remollo desde a noite anterior

5 paspallases

2 allo porros

2 cenorias

2 cebola

250 gr. de xamón (unha fatía grosa para facer taquiños)

1 pemento vermello

1 tomate maduro

Allo, perexil, sal

Aceite de oliva

- Empezaremos por lavar ben as lentellas (nun coador ou escorredor grande), debaixo da billa, para que se liberen totalmente de pó e restos de terra.

- Agora imos repasar os paspallases.

- Preparamos un machucado con allo, perexil e sal para adubar os paspallases, por dentro e por fóra.

- Cortamos as verduras e o xamón (en taquiños) e o botamos coas lentellas nunha tarteira e cubrimos todo con auga, engadimos sal. Deixamos cocer entre 30 e 40 minutos a lume maino.

- Na tixola poñemos un fondo de aceite e, nese aceite quente, douramos os paspallases. Douradas as aves, incorporámolas á tarteira das lentellas. Na mesma tixola, e co mismo aceite, imos preparar un sofrito con cebola, pemento e tomate para engadir ás lentellas. Cando estea feito o sofrito o botamos na tarteira das lentellas e deixamos que remate de facerse todo xunto.

- Cando pasen os 30-40 minutos probamos as lentellas e miramos tamén que as aves estean xa feitas, é dicir, que a carne se desprenda con facilidade do oso cando tiras un pouco dun zanquiño.

-Empratamos e levamos á mesa.

A ILLA DO TESOURO


Os lambóns máis simpáticos da Televisión de Galicia regresan hoxe martes, sobre as dez da noite, cun novo capítulo no que o cociñeiro de Chapela, Benigno Campos, e a súa axudante Lola prepararán un riquísimo guiso de pota que lles vai quitar o sentido, ademais como aperitivo os noso amigos vanse dar un gusto: prepararán uns camaróns das nosas rías.

Para tan ricos manxares o xornalista de investigación Tomás Alonso desprazarase ata a Illa de Arousa, na provincia de Pontevedra, para visitar a batea do seu amigo Alfonso. Tomás vai a batea pero non a por mexillóns, vai por camaróns, os mellores do mundo.

O primeiro que terá que facer o noso larpeiro itinerante vai ser coller o trueiro ou truel para ir percorrendo con el esas algas chamadas golfos, que tanto lles gustan os camaronciños.

Así que unha vez coñecida a teoría sobre o mundo do camarón, Tomás irá cara a Pontevedra, para visitar no mercado ao seu amigo Marcos. O seu peixeiro de cabeceira prepararalle unha boa pota, cuns camaróns e unha cabeza de peixe sapo para o guiso.

Veremos como lle queda a Benigno ese guiso. Atentos o prato, larpeiros. Eu non o perdería, lambonciños!!

lunes, 1 de agosto de 2011

TRES EN RAIA

O martes día dous de agosto ás 22:15h na TVG, D.Benigno terá como obxectivo darlle gusto aos larpeiros cun prato ben rico: unha caldeirada de raia e unhas empanadiñas de mexillóns como aperitivo.
En Portonovo, Tomás vai recibir un curso acelerado de peixes planos como o rodaballo, o coruxo, a solla ou o linguado, pero o que realmente vai pescar o noso mariñeiro de auga doce son raias, ou mantas de mar…eses peixes ricos, finos e delicados.
En fin, veremos como lle queda aos nosos intrépidos cociñeiros este guiso mariñeiro.

martes, 19 de julio de 2011

RECEITA: PATA CON GARAVANZOS E ESPINACAS

INGREDIENTES (PARA 5 PERSOAS):

1 PATA DE TENREIRA

700 GR DE GARAVANZOS

4 MANCHEAS DE ESPINACAS

1 CEBOLA

CRAVO

LOUREIRO

1 PEMENTO VERMELLO

3 CENORIAS

3 DENTES DE ALLO

ACEITE DE OLIVA

SAL



- Nunha cazola poñemos a cocer a pata picada e limpa cunha cebola enteira pelada cuns dentes de cravo incrustados, unha folla de loureiro e uns bos anacos de cenoria. Deixamos que coza todo a media cocción e engadímoslle os garavanzos, previamente remollados, e ao final as espinacas.

- Cando todo estea cocido, nunha tixola facemos un refrito de cebola, allos picados e pemento vermello, tamén picado, que engadimos á cazola, e deixamos que coza todo durante cinco minutos.

"QUE COUSAS TEN O MAR"

Os lambóns máis simpáticos da Televisión de Galicia regresan hoxe, sobre as dez da noite, cun novo capítulo no que o comandante Benigno Campos e a almiranta Lola Vilela prepararán un riqúisimo arroz con cachiños de peixe sapo e ourizos, como acompañamento tanto no arroz, coma no aperitivo.

Para tan exquisitos manxares, o xornalista de investigación Tomás Alonso, desprazarase ata a localidade pontevedresa de Oia, na Costa do baixo Miño, na fachada atlántica galega onde baten con forza as ondas nos rochedos. O noso larpeiro tratará de aprender o oficio de apañador de ourizos e para iso contará coa inestimable colaboración de Carme, unha mariscadora veterana.
Despois irá cara a Ramallosa para mercar na peixería "Xanela do Mar" un bo peixe sapo e un par de quilos de ourizos frescos.
Veremos como sae ese arroz. Eu non o perdería, larpeiros!!

lunes, 11 de julio de 2011

"Metemos a pata!"


Mañá pola noite, (ás 21:55 na TVG), o comandante Benigno e a almiranta Lola prepararán un riqúisimo guiso de pata de tenreira con garavanzos e algunha que outra sorpresiña, como unhas alcachofas con salsa de iogur e unha crema de iogur con fresas.
Para tan exquisitos manxares, o xornalista de investigación Tomás Alonso desprazarase ata a localidade coruñesa de Mesía, onde terá a Guillermo como guía na súa visita a Casa Grande de Xanceda onde se elaboran algún dos mellores iogures ecolóxicos do país. O noso larpeiro poderá comprobar como se crían unha vacas felices e en liberdade as que lles extraen o leite dun xeito moi moderno e, sobre todo, sostible.
Non o perdades!!

lunes, 4 de julio de 2011

"Peixe e verduras"

Este martes, a responsable dos fogóns do Museo do Mar de Vigo, Celia Cabrera, acompañará o mestre Benigno na preparación dunha sopa de peixes de rocha con algas das nosas rías.
Antes, Tomás Alonso, desprazarase ata Cangas. Ali, co seu amigo Fermín, percorrerá as rochas da zona na procura das verduriñas de mar máis axeitadas para facer esa sopa e outras moitas receitas.
A ver como lles vai. Eu non o perdería, larpeiros!!

lunes, 20 de junio de 2011

Martes 21 de xuño ás 21:55 na TVG: "UNHA LAMPREA E UN BACALLAU"



Mañá, don Benigno, vai preparar un saboroso bacallau á Gomes de Sá. Ademais coma aperitivo haberá lamprea.

Para tan ricos manxares o xornalista de investigación Tomás Alonso desprazarase ata a vila pontevedresa de Arbo, a beira galega do río Miño para ver como os pescadores da zona levan a cabo unha tradición secular: a pesca da lamprea con viturons.

Co monstro mariño no cesto Tomás regresa a casa coa satisfación de ter ben feito o seu traballo. Agora tócalle a vez a Benigno, o cociñeiro, a ver como se porta e como sae todo. Veremos como lle queda o seu prato e que din os larpeiros. Eu non o perdería, lambonciños!!

jueves, 16 de junio de 2011

RECEITA - ALBÓNDEGAS CON SALSA DE VERDURAS


INGREDIENTES (para 5 persoas):

600 gr de carne picada de tenreira ou porco (ou porco celta)

2 cenorias

1 cebola grande

2 ovos

Faragulla de pan

Fariña de trigo

Aceite de oliva

Sal



SALSA

1 cebola

1 pemento vermello

1 cenoria

1 allo porro

1 dente de allo

1 tomate pelado

1/2 vaso de caldo de carne

1/2 vaso de viño

Sal



- Nun recipiente fondo poñemos a carne, de tenreira ou porco (ou porco celta), ou a mestura das dúas, cunha parte de porco por tres de tenreira, a cebola e a cenoria moi picadas, a faragulla de pan remollada en leite ou auga, segundo o gusto de cadaquén, e ben escoada, e os ovos. Amasámolo todo e facemos unhas bólas, que enfariñaremos antes de fritilas nunha cazola con aceite. Retirámolas ben escoadas e reservámolas para máis adiante.

- No mesmo aceite coado facemos un refrito co resto das verduras picadas, ao que engadiremos as albóndegas, o caldo de viño, e tras douralas un pouco deixamos cocer durante quince minutos.

- Botamos as albóndegas nunha fonte e cubrímolas coa salsa, que previamente pasariamos por un pasapurés.

- Unha boa gornición podería ser un arroz en branco.

viernes, 10 de junio de 2011

RECEITA - POLBO CON PATACAS

INGREDIENTES (para 5 persoas):

1 polbo de 2 kg

500 g de patacas

1 cebola grande

3 dentes de allo

1 pemento vermello

1 pemento verde

1 tomate pelado

200 g de chícharos

1 cenoria

1 cullerada de pementón moído doce

Aceite de oliva

Sal

- Nunha pota poñemos a auga a ferver e, cando entre en ebulición, engadimos o polbo, previamente desconxelado e ben limpo (se o polbo fose fresco, deberiamos conxelalo uns días, para que estea máis tenro), deixamos que coza durante vinte minutos e reservámolo, o mesmo que o seu caldo.

- Nunha cazola á parte facemos un refrito con todas as verduras, e deixamos o tomate picado para o final. Cando estea listo, engadimos as patacas cortadas en anacos e o pemento moído. Mesturámolo todo xunto co caldo que reservaramos do polbo, e deixamos que coza ata que as patacas estean feitas, momento en que engadimos o polbo cortado coma se fose á feira, e deixamos que se faga todo durante uns cinco minutos.

RECEITA - LURAS RECHEAS NA SÚA TINTA

INGREDIENTES (para 5 persoas):

5 luras grandes ou medianas

3 cebolas grandes

1 tomate

4 dentes de allo

1 vaso de viño branco

Sal

Aceite de oliva

- Limpar ben as luras con moito coidado e conservar a súa tinta.

- Picar as aletas e as cabezas cos tentáculos e refogalas ben cunha cebola picada. Con este refrito encheremos o corpo das luras, que podemos pechar cuns escarvadentes.

- Nunha cazola á parte poñemos seis culleradas de aceite, no que botaremos as dúas cebolas restantes ben picadas, xunto co allo laminado, que douraremos sen que se queime, para logo incorporar o tomate pelado e picado xunto co viño. Refogámolo todo e incorporamos a tinta das luras e o sal, segundo a gusto de cada un. Cando a salsa estea ben feita, triturarémola co batedor. Xuntarémola coas luras e deixarémolo todo a lume baixo ata que estean cocidas, variando o tempo dependendo do tamaño das luras.

- Se fosen conxeladas, tamén podemos usar tinta de chocos ou dunha xiba grande.

- A gornición perfecta pode ser un arroz en branco cuns anacos de pan torrado.

martes, 7 de junio de 2011

UN SEÑOR CON OITO PERNAS!



Esta noite ás 21:55 na TVG podedes ver un novo capítulo das aventuras dos larpeiros, e como non, disfrutar dun novo prato do mestre Benigno. Bó proveito lambonciñ@s!

martes, 31 de mayo de 2011



Esta noite os larpeiros comandados polo mestre dos fogóns, Benigno Campos, cociñarán unhas luras recheas con arroz.
Para tan exquisito manxar, Tomás desprazarase ata Cambados, onde embarcará con José Benito e a súa tripulación para pescar unhas luriñas coa arte do boliche.
En fin, veremos como sae todo. As 21:55 na TVG!

jueves, 26 de mayo de 2011

RECEITA - NAVALLAS CON ARROZ

INGREDIENTES (para 5 persoas):

4 ducias de navallas

500 gr de arroz

1 cebola

1 pemento vermello

tomate triturado

allo, perexil e sal

aceite de oliva

azafrán e colorante

- Poñemos auga a ferver e , cando burbulle, botamos as navallas, que se abrirán rapidamente. Retirámolas do lume e sacamos a carne das cunchas, á vez que reservamos a auga da cocción.

- Nunha cazola poñemos aceite e facemos un refrito coa cebola picada, o pemento, o allo, o perexil e o sal machucados, ao que engadiremos o tomate cando a cebola estea transparente. Unha vez feito o refrito, botamos o arroz, poñemos azafrán e incorporamos o resto do caldo de cocer as navallas. Darémoslle o tempo de cocción preciso para facelo caldoso.

- Podese cambiar o arroz por fideos, nese caso deben estar "al dente".

viernes, 20 de mayo de 2011

Vaia corte!



O martes Benigno e Lola prepararán unhas navallas da ría á prancha e unha paella de verduriñas que quitan o sentido.
Para tan exquisito manxar, Tomás Alonso desprazarase ata Campelo e subirá ó barco de Suso e David, para baixar as profundidades mariñas da illa de Tambo e conseguir unhas navallas.
Mentres Lola acercarase ata Moaña, a súa terra natal, para mercar unha ricas verduriñas das hortas galegas da zona.
Navallas da ría, verduriñas do país…ummm! Todo soa a música celestial larpeiros, poderían facer un prato de sete estralos. Veremos como sae.
Eu non o perdería, lambóns!!

lunes, 16 de mayo de 2011



O dia das Letras Galegas os Larpeiros van preparar un menú á altura desta festividade: Arroz con Bogavante!!
Non falledes á cita. Ás 21:55 na TVG.

viernes, 6 de mayo de 2011


O martes 10 de maio, ás 21:55h, na TVG, os larpeiros van cociñar unha caldeirada de peixe das que fan historia. Non o perdades!

miércoles, 4 de mayo de 2011

RECEITA - PORCO CON CERVEXA

INGREDIENTES (para 5 persoas):

2 kg de lombo fresco de porco

1 litro de cervexa

1 kg de champiñóns

2 cebolas grandes

Arroz basmati

1 cunca de chícharos

3 cenouras

Fariña

Allo, aceite e sal

Comezamos cortando a peza de lombo en rodaxas duns 2 centímetros e as adubamos. Enfariñamos a carne e a poñemos a dourar nunha tarteira con aceite quente. Mentres aproveitamos para ir cortando en xuliana as cebolas e as incoporamos á tarteira. Despois se cortan os champiñóns en cuartos e cando a cebola estea case pochada se engaden tamén á tarteira. A continuación botamos a cervexa, é suficiente con que cubra as rodas de lombo. Movemos a tarteira, para que se reparta ben e deixamos que se faga todo durante uns 15 minutos.

Para o acompañamento, poñemos auga a ferver e mentres cortamos as cenouras. Cando ferva botamos as hervillas e a cenoura. Cando volva a ferver engadimos o arroz e a sal. Unha vez recupere de novo a fervura deixamos cocer nove minutos.

Para presentar o arroz untamos con aceite un molde e botamos dentro o arroz, o colocamos no centro dunha fonte e arredor poñemos as rodas de raxo co prebe.

Tamén se podería acompañar o lombo con puré ou patacas fritidas.

lunes, 2 de mayo de 2011

Marchando unha cervexa!



Este martes don Benigno vai preparar un delicioso porco con cervexa que fará moi felices ós larpeiros e agardamos que tamén a vos.

Non o perdades, ás 21:55 na TVG.

lunes, 25 de abril de 2011

RECEITA - RAIA CON ARROZ MARIÑEIRO

INGREDIENTES (para 5 persoas):
As alas de duas raias de dous quilos

Para o caldo:
Cabeza de sapo
1 rama de apio
1 cebola, allo
2 cenouras
1 vaso de viño branco

Para o arroz:
Un cuarto de quilo de berberechos
Un cuarto de quilo de ameixas babosas
2 cebolas
1 pemento vermello
Allo, aceite
Medio quilo de arroz

- Comezamos polo caldo, e para extraer mais sabor da cabeza de peixe e das verduras, en vez de poñelas a cocer directamente en auga, as metemos no forno, uns 25 minutos, a 180 º. Mentres limpamos a raia.

Pasados os 25 minutos, retiramos a bandexa de forno coa cabeza de peixe e as verduras e as colocamos nunha tarteira ao lume, engadindo apio, perexil, folla de loureiro e cubrimos todo con auga fría. Debe cocer a lume maino uns 20-25 minutos.

- Aproveitamos para facer un sofrito. Picamos moi ben as cebolas, o pemento e o allo, e os poñemos a pochar nunha tarteira. Cando estea listo o sofrito, botamos o arroz. De seguido botamos tamén o caldo.

- A continuación metemos a raia no forno de 8 a 10 minutos. Unha vez asada a reservamos pero retirandolle os cartílagos.

- Cando o arroz estea listo engadimos os berberechos e as ameixas á tarteira. Tamén incorporamos sobre o arroz un machucado de allo, aceite, perexil e viño. Deixamos cocer todo xuntos uns minutos máis.

- Por último colocamos a raia limpa sobre o arroz.

RECEITA - OSTRAS FRITIDAS

INGREDIENTES (para 5 persoas):
Dúas ducias de ostras grandes.
Fariña de millo.
Aceite

- O primeiro é abrir e separar as ostras das cunchas. Despois hai que aliñalas cunha pinguiña de limón en cada ostra (sen sal), seguidamente se pasan as ostra pola fariña.

- Poñemos unha tixola no lume con aceite e vamos fritindo as ostras en aceite ben quente. Cando estean douradiñas se retiran a un prato cun papel absorbente para eliminar o exceso de aceite e se dispoñen nunha fonte.

Martes 26 de abril

Este martes non podedes faltar a cita cos larpeiros, coma sempre ás 21:55 na TVG.

lunes, 18 de abril de 2011

RECEITA - TUDILLO CON GRELOS

INGREDIENTES (para 5 persoas):
5 CODILLOS PEQUENOS, FRESCOS, SEN PEL
3 ATADOS DE GRELOS
2 PORROS
2 CEBOLAS
2 PEMENTOS VERMELLOS
4 CENORIAS
TOMATE NATURAL
VIÑO BRANCO
ACEITE
FARIÑA
PATACAS REDONDIÑAS, PEQUENAS (DE GORNICIÓN)

- Para comezar adubamos os codillos con allo e perexil, douramolos cun fondo de aceite na tarteira e cando tomen cor, engadimos as verduras cortadas en anacos (porros, cebolas, pementos, cenorias).
Despois de pochar un pouco as verduras, incorporamos o tomate.
Regamos con viño branco e completamos con auga.
Deixamos cocer con calma durante unha hora.

- Nunha pota con auga e sal poñemos cinco patacas medianas-grandes en cachos xenerosos.
Usamos o tempo en que as patacas empezan a cocer para lavar e cortar os grelos e os incorporamos na ola onde xa ferven as patacas.
Unha vez cocidos xa podemos retirar e escoar os grelos.
Cando tamén estean feitas as patacas as retiramos para un bol amplo e esmagámolas cun garfo.
Coa axuda dun cullerón, incorporamos algo da auga da cocción, para que non quede mesto ou duro de mais.
Imos incorporándolle un fío de aceite de oliva, para que quede ben ligado. Axustámolo de sal.

- No último momento, imos refogar os grelos nunha tixola cunhas culleradas de aceite nas que douramos uns allos en láminas e incorporamos os grelos previamente escoados.

- Nunha fonte de servir, dispoñemos os tudillos, o puré de patacas e os grelos refogados con arte, e listo!

"SEN PASAR DA RAIA!"


Os lambóns máis simpáticos da Televisión de Galicia regresan este martes 19 de abril, ás 21:55, cun novo capítulo e unha invitada moi especial. A cociñeira Lucía Freitas preparará xunto a Benigno Campos, unha riquísima receita. Para o aperitivo unhas ostras e para o plato principal unha deliciosa raia con arroz. E, ¿ónde irá Tomás?

martes, 12 de abril de 2011

HOXE, TUDILLO CON GRELOS

Os lambóns máis simpáticos da Televisión de Galicia regresan esta noite cun novo capítulo no que o comandante Benigno Campos preparará un exquisito tudillo con grelos.
En fin, camaradas, o prato de hoxe promete. Veremos como sae. Eu non o perdería, larpeiros!!

lunes, 11 de abril de 2011


Mañá martes día 12 ás 21:55 na TVG: "Manda grelos"!

RECEITA - GUISO DE POLO CON COGOMELOS

INGREDIENTES (para 5 persoas): Un polo campeiro ou caseiro sobre 2,5 quilos 2 cebolas Allo, perexil 1 pemento vermello 1 cunca de chícharos Tomate 1/2 quilo de cogomelos Fariña, aceite e sal Caldo de polo - Comezamos adubando o polo con allo, perexil e sal, e o douramos no aceite. Mentres se doura picamos a cebola e o pemento e o incorporamos á tarteira xunto cos chícharos. Pasados uns minutos engadimos o tomate natural. Deixamos facer uns minutos. - Poñemos uns culleróns de caldo de polo para que coza un pouco (10 minutos). Mentres coce, limpamos os cogomelos e pasados os dez minutos os engadimos ao guiso. - Deixamos que o conxunto se cociñe a lume maino 30-40 minutos. Mentres o guiso segue a facerse, poñemos a cocer o arroz para acompañar. (Podemos aproveitar o caldo para darlle máis sabor).

miércoles, 30 de marzo de 2011

RECEITA - ARROZ CON BERBERECHOS

INGREDIENTES (para 5 persoas):
3 k de berberechos (purgando en bol con auga e sal)
12 langostinos ou gambóns (cocidos)
500 grs de arroz
1 cebola tenra, allo
1 pemento vermello
1 pemento verde
Media cunca de chícharos
Tomate natural Azafrán
Aceite de oliva e sal

- Poñemos ao lume unha ola con abundante auga, cando estea case fervendo botamos os berberechos ata que abran, entón os retiramos e reservamos o caldo.

- A continuación encedemos o forno.

- Despois collemos unha tarteira de barro na que botamos aceite. Cortamos as verduras e as incorporamos á tarteira ata que pochen ben.

- Mentres retiramos as viandas das cunchas.

- Cando o sofrito estea case listo engadimos o tomate, agardamos uns tres minutos e botamos tamén o arroz e o azafrán. Remexemos durante un par de minutos e despois botamos o caldo. Rectificamos de sal e metemos a tarteira no forno durante 15 minutos. Pasado ese tempo abrimos o forno e incorporamos os berberechos. Deixamos que se fagan outros 5 minutos.

- Por último adornamos cos langostinos cocidos.

martes, 29 de marzo de 2011


Hoxe á noite, ás 21:55 na TVG, "O santo dos Croques!". Non o perdades lambonciños e lambonciñas!

jueves, 24 de marzo de 2011

RECEITA - TORTA DE QUEIXO
INGREDIENTES
(para 5 persoas):

5 ovos
1 terrina de queixo tipo Philadelphia de 200g.
1 iogur natural
1/2 L de nata líquida
1 1/2 vaso de azucre, medido polo vaso do iogur
1 vaso de fariña, medida polo vaso do iogur

- Trituramos todos os ingredientes cun batedor e pasámolos a un molde untado con manteiga.

- Metemos a mestura no forno a 200 graos durante 45 minutos, e xa está lista.

- Pódese tomar morna ou fría.
RECEITA - BERENXENAS RECHEAS DE BACALLAU
INGREDIENTES (para 5 persoas):


3 berenxenas grandes

1 kg de migas de bacallau

2 cebolas

3 dentes de allo

2 vasos de salsa de tomate

1/2 L de leite

3 culleradas de fariña

12 liscos de queixo

Aceite de oliva

Perexil

- Unha vez lavadas as berenxenas, cortámolas pola metade e facémoslles uns cortes transversais, botámoslles un chorro de aceite a cada unha e metémolas no forno a 200 graos durante quince minutos. Baleirámolas e reservamos a súa polpa e a pel.

- Nunha tixola poñemos aceite e engadímoslle a cebola e o allo moi picadiños. cando a cebola estea transparente, botámoslle o bacallau, previamente remollado e desalgado. Deixamos que se faga e incorporámoslle a polpa das berenxenas e a salsa de tomate, mesturamos ben e con este compango enchemos as berenxenas.

- Nun recipiente á parte facemos unha bechamel poñendo un pouco de aceite e fariña, aos que lles engadimos leite e removemos ata lograr a textura adecuada. Cubriremos as berenxenas co bechamel e cos liscos de queixo, e metémolas no forno ata que funda o queixo, aproximadamente nuns cinco minutos
.

lunes, 21 de marzo de 2011

RECEITA - CONGRO CON FIDEOS

INGREDIENTES (para 5 persoas):
1 1/2 kg de congro da parte alta
500 g de fideos
1 cebola grande
1 pemento vermello
1 pemento verde
2 tomates pelados
3 dentes de allo
1 L de caldo feito coa cabeza do peixe
1 papel de azafrán e outro de colorante
Aceite de oliva
Sal

- Nunha cazola botamos o aceite, o allo, a cebola e os pementos ben picadiños. Cando empece a dourarse, engadimos o tomate, tamén picado.

- Cando este o refrito, botamos o congro en anacos, ao que uns minutos antes botariamos un pouco de sal. Incorporamos os fideos, xunto co caldo, o azafrán e o colorante. Deixamos cocer tendo coidado de que non se pegue, e cando o fideo estea al dente, retirámolo do lume e xa está listo para servir.

"Vacas a todo color!"


O martes 22, ás 21:55 na TVG, o noso intrépido investigador vai descubrir un lugar moi especial, a Granxa Maruxa, onde as vacas viven como raiñas.
Pero tamén haberá sorpresas na cociña dos Larpeiros, onde o mestre Benigno vai preparar unhas berenxeas recheas desas de "cómeme, cómeme".

martes, 15 de marzo de 2011

RECEITA - GUISO DE COELLO CON PATACAS

INGREDIENTES (para 5 persoas):
Un coello e medio
Dous quilos de patacas
Duas cebolas
Dous alloporros
Un pemento vermello
Tomate natural
Xudías verdes (300-400 gr)
Unha cunca de hervillas ou chicharos
Azafrán moído
Allo e perixel fresco
Un vaso de Viño branco
Aceite e Sal

- O primeiro e facer un adubo, con allo, perixel e sal, para untar a carne. Unha vez ben adubado douramos o coello nunha tixola con aceite. En canto a carne estea ben selada a retiramos e a reservamos.

- A continuación preparamos un sofrito. Nunha tarteira con aceite refogamos cebola, pemento vermello e alloporro. Unha vez pochadas as verduriñas engadimos o coello e tamén o tomate. Regamos todo con viño e auga e deixamos cocer durante 5 minutos. Despois botamos as xudías, cortadas en bastonciños, e os chícharos. Por último se engaden as patacas e o azafrán.

- Despois de 25 minutos estará listo o guiso.

RECEITA - EMPANADA DE CHOCOS

INGREDIENTES (para 5 persoas):
Para a masa
Medio quilo de fariña
Un vaso de auga morna
Un pouco de levedo de panadería
Sal
Para a zaragallada ou recheo
1,5 quilos de chocos, mellor se son grandes
6 cebolas
1 pemento verde e outro vermello
Un pouco de viño
Aceite

- Comezar amasando a mestura de fariña, auga, levedo e sal. Despois cubrir a masa cun pano e deixala repousar lonxe das correntes de aire.

- A continuación, preparar o recheo ou zaragallada:
Picar as cebolas e os pementos e refogalos. Limpar e lavar os chocos e engadilos ás verduras. Añadir o viño e a tinta. Deixar que o conxunto se guise uns minutos e mentres se poñer a quecer o forno.

- Dividir a masa en dúas metades e estiralas por separado usando un rolo de cociña, procurarndo que queden moi finas. O seguinte paso é pintar con aceite o fondo da chapa do forno e dispoñer nela a primeira metade da masa estirada sobre a bandexa para botar e repartir dentro o guiso de choco. Unha vez chea, colocamos porriba a segunda metade da masa e xuntamos ben os dous bordos, é preciso facerlle un burato no medio para que "respire" e poida sair o exceso de vapor.

- Meter no forno a 180º durante uns 40 minutos.

RECEITA - LASAÑA DE CARNE E REQUEIXO

INGREDIENTES (para 5 persoas):
15 LÁMINAS DE PASTA PARA LASAÑA
1 KG DE CARNE PICADA DE TENREIRA (xa a tempos adubada con (allo, perixel e sal)
1 KG DE CHAMPIÑONS
1 BOL DE REQUEIXO CREMOSO
1,5 L UN BOL XENEROSO DE SALSA DE TOMATE ESPESA
250 GRS DE QUEIXO EN LONCHAS
CUÑA DE QUEIXO PARA RELAR
BECHAMEL
CEBOLA
ACEITE, SAL

- O primeiro é prender o forno a 180º.

- Nunha tíxola douramos a cebola picada. Mentres vai refogando, laminamos os champiñóns e cando a cebola estea douradiña engadimos os champiñóns.

- Cando estean listos, é o momento de engardir a carne picada e refogala remexendo para que se vaia facendo lentamente. Cando a carne estea feita botamos a salsa de tomate e mesturamos todo.

- A continuación botar dúas culleradas sopeiras de requeixo.

- Nunha ola poñemos a quentar auga, con aceite e sal. Cando ferva engadimos a pasta. Unha vez cocida a pasta colocase nunha fonte de forno: unha capa de pasta, outra de recheo e outra de queixo en lonchas; de novo pasta, recheo e queixo, e para rematar unha capa de bechamel.

- Depois ralar o queixo e meter no forno sobre 5 ou 10 minutos ata que se gratine ben.

lunes, 14 de marzo de 2011

Peixe grande ande ou non ande


O martes 15 de marzo, ás 21:55 na TVG: Congro con fideos.

Os lambóns máis simpáticos da Televisión de Galicia regresan mañá martes cun novo capítulo no que o cociñeiro Benigno Campos preparará un congro con fideos.

Para tan exquisito manxar, o xornalista de investigación Tomás Alonso desprazarase ata a localidade coruñesa de Riveira para coñecer a pesca do congro.

Cunha bolsa dos mellores fideos e cun bó congro que mercará na Praza de Abastos de Pontevedra, Tomás chegará ó pazo dos larpeiros cos ingredientes precisos para a receita de Benigno… veremos como sae.

martes, 8 de marzo de 2011


Hoxe ás 21:55 na TVG

"Imos a pataqueira!"

lunes, 28 de febrero de 2011

RECEITA - PEMENTOS DO PIQUILLO RECHEOS DE BACALLAU

INGREDIENTES (para 5 persoas):
10 pementos do piquillo
1/2 kg de migas de bacallau
2 cebolas
Allo e perexil
Fariña
Ovo
Tomate

- Unha vez que se puxeron a remollo as migas de bacallau, poñemos nunha tixola a cebola ben picada, o allo e o perexil machucados, e sofritímolo todo con aceite. Cando abrande a cebola, engadímoslle o bacallau, refogándoo todo moi ben; depois botámoslle un par de culleradas de fariña e un pouco de leite, e con esta mestura facemos unha especie de bechamel, que agregaremos ao bacallau.

- Nunha tixola á parte poñemos un chorro de aceite e fritimos un pouco os pementos, que retiraremos para deixar que enfrien. Nese mesmo aceite poñemos o tomate pelado e picadiño, e facemos unha salsa suave que pasaremos polo triturador ou un coador chinés.

- Os pementos, unha vez frios, enchémolos coa mestura de bacallau, pasámolos por fariña e ovo e frtímolos en abundante aceite. Despois cubrímolos coa salsa e xa se poden servir.

Mañá martes 1 de marzo, ás 21:55 na TVG veredes unha nova entrega de Larpeiros, neste caso sobre o requeixo da Capela. Onde don Benigno vai preparar unha deliciosa lasaña de carne con requeixo. Ata mañá!!

martes, 22 de febrero de 2011

RECEITA - RABO DE TOURO

INGREDIENTES (para 5 persoas):
2 kg de rabo de touro
Allo, perexil e sal
Fariña
1 cebola
1 pemento vermello
1 cenoria
2 porros
1 rama de apio
2 tomates
Aceite de oliva
Coñac

- Cortamos o rabo en anacos de cinco centímetros, aproximadamente, adubámolo con allo, perexil e sal machucados, pasámolo por fariña e dourámolo nunha cazola con aceite.

- Cando estea dourado, botámoslle a cebola, o pemento e un par de porros picados, a rama de apio, a cenoria picada e un par de tomates en anacos, refogámolo todo e incorporamos a copa de coñac, cubrímolo con auga e deixamos que coza tapado a lume baixo ata que a carne se desprenda ben do óso (mellor nunha ola rápida ou a presión).

- Como gornición, un arroz en branco vaille moi ben.

Hoxe martes 22, ás 21:55 na TVG veredes unha nova entrega de Larpeiros, neste caso sobre o pemento de Arnoia. Onde ademáis, don Benigno fará unha visita a casa de turismo rural "A Parada das Bestas" en Palas de Rei. Non o perdades!!